الطـّـُـلبة

البارح وأنا خارج من الخدمة (أيه البارح الأحد، ونهار الأحد هوني خدمة) مازلت في الباركينق وقف بحذايا واحد بكرهبة طولها طولين و عرضها عرضين ماركتها شفرولي كابريس .. وراكب بحذاه كائن فضائي أكحل بكلّو (ضّاهر فيها مرتو خايفة مالعينين) هبّط الشّبّاك متاعو وقالّي "السّلام عليكم" رجّعتلو السّلام. بدا يحكي بزربة ما فهمت منّو كان "خوي معلّم.. مات.. حرمتي مريضة.. سيّارتي.. بنزين .. مافيش.. والله يعطيك العافية.." وقتها فهمة الّي سي الأكابري بوروبة بيظاء هذا يطلب في الفلوس من كرهبتو الّي سومها و هيّ قديمة قدّ سوم كرهبتي الأوكازيون 15 مرّة كيف كانت جديدة.. تو هاذم عباد؟ الحاصيلو ما فهمت كان كيف ريت بلاكة الكرهبة ماتريكيل سعودي كيف قصد ربّي وأعتقني..
زيدو إتمنيكو على اللّيبيّة توّة.. والله ظهروا خيار النّاس اللّيبيّة، كيف كلّ يوم تشوف غريبة كيما هكّة

ربّي يقدّر الخير

توّا يجي جمعة ولاّ أكثر والمصايب النّبي مولاك: هاو البعيدة زلزال بو سبعة ريشتر في تايتي ماتو فيه ميّات الآلاف خلق وتخربت فيه بلاد كاملة في دْرَجْ من زمان..

مازلنا نتبّعو في هالمصيبة تقوم إتطيح الطيّارة الأثيوبيّة وهيّ مروّحة من لبنان يموتو فيها الكـُـلّ.. الكُـبّانيّة محترمة والطّيّارة هذا الّي يقلّك بوينق محسوب جديدة.. أما قالّك هبطت عليها الله معافينا فودر لا تقرا لا تكتب (ما نحبّش نكتبها بالعربي على خاطر أوّلا ً إسمها مانحبّوش، وثانيا ً ماعنديش مذيع ولاّ منشّط تلفزي يمرجلي في الكبدة باش نتكلّم بهالعربيّة القحة.. نعرف، نسيت حرف.. أما المقصود وصل).

نرجع للموضوع الأصلي إلّي هوما المصايب الـّي في جرة بعضها، بلدان تاقف و تعاون و تورّي رجوليّتها في هالنّوع من المواقف، ودول أخرى تبدا تجبد في روحها و تأوّل في هالكوارث بطريقتها (في "ربّي يعاقب فيهم الكفّار علاش نعاونو فيهم"، في "ربّي يعرف أش يعمل و يكون كفر كان نتدخّلو أحنا باش نعاونو"، و لصّق و قيّد على ربّي.. ولا داعي لذكر الأسماء لعدم الإحراج) وهذا الكلّ باش ما يعاونوش عباد زواولة ومنكوبين بزوز فرنك.. تي حتّى بالّي كتــب ربّي، خاصّة كيف تبدا هالدّول ظاربة على قلبها نسبة كبيرة من المخزون الدولي للبترول.. توّا كان من جانفي اللطف العام بدا هكّة، الواحد ما بقالو كان يقول ربّي يعدّي هالعام على خير بعد ما كنّا فرحانين بيه.

أيّا نهاركم زين

يا ربّي لعمال عليك

أيّا قلنا السّلام

أنا مانيش مُدوّن بروفيسيونال أما لقيت إلّي التّدوين نوع من الدّودة إلّي تفرهد
مالة هاذي إفتتاحيّة و خلّي كان فمة موضوع تو نوسّع بالي على تدوينة باهية
نهاركم زين